महाराष्ट्र नॅशनल कॅडेट कॉर्प्स (एनसीसी) संचालनालयाने प्रतिष्ठेच्या ‘प्रधानमंत्री बॅनर’चे विजेतेपद पटकविले आहे. पंतप्रधान नरेंद्र मोदी यांच्या हस्ते महाराष्ट्राला हा मानाचा पुरस्कार प्रदान करण्यात आला. महाराष्ट्राने सलग दोन वर्ष प्रधानमंत्री बॅनर पटकाविण्याची कामगिरी केली आहे.
दिल्लीतील करीअप्पा मैदानावर आयोजित एनसीसी रॅलीत मोदी यांच्या हस्ते ‘प्रधानमंत्री बॅनर’ 2022-23 च्या विजेत्या व उपविजेत्यासह एनसीसीच्या बेस्ट कॅडेट्सना सन्मानित करण्यात आले.

अधिक माहिती
● महाराष्ट्र एनसीसीची सुकन्या राणा दिवे, सिनियर अंडर ऑफिसर देवेंद्र बडगुजर, संचालनालयाचे अतिरिक्त महासंचालक मेजर जनरल वाय.पी.खंडुरी यांनी पंतप्रधानांच्या हस्ते विजेतेपदाचा करंडक स्विकारला.
● देशातील एकूण 17 एनसीसी महासंचालनालयाच्या डिसेंबर 2021 ते नोव्हेंबर 2022 मधील विविध स्तरावरील मुल्यांकन तसेच यावर्षी 1 ते 28 जानेवारी दरम्यान दिल्लीत आयोजित प्रजासत्ताक दिन शिबिरात महाराष्ट्राला विजेत्याचा तर तमिळनाडू ,पुद्दूचेरी आणि अंदमान एनसीसी संचालनालयास उपविजेतेपदाचा बहुमान प्रदान करण्यात आला.
● महाराष्ट्र एनसीसी संचालनालयाला यापूर्वी एकूण 18 वेळा प्रधानमंत्री बॅनरचा बहुमान मिळाला आहे.
● राज्याने मागील वर्षी हा प्रधानमंत्री बॅनरचा मान पटकाविला होता. यंदा राज्याने त्याची पुनरावृत्ती केली.