आळंदी येथील डॉ. नारायण महाराज जाधव यांना 2023 चा राज्य सरकारचा ‘ज्ञानोबा-तुकाराम पुरस्कार’ जाहीर झाला आहे. सांस्कृतिक कार्यमंत्री सुधीर मुनगंटीवार यांनी जाधव यांचे अभिनंदन केले आहे. डॉ. जाधव मुळचे कर्जुले हरिया (ता. पारनेर, जि. नगर) येथील रहिवासी आहेत.

अधिक माहिती
● घरात वारकरी संप्रदायाचा वारसा असल्याने डॉ. जाधव यांची पावले आळंदीकडे अध्ययनासाठी साधारण नव्वदच्या दशकात वळाली.
● आळंदी येथे आल्यानंतर येथील सदगुरु जोग महाराज वारकरी शिक्षण संस्थेतील तत्कालीन अध्यक्ष वै. विठ्ठल महाराज चौधरी ऊर्फ मोठे बाबा यांच्या हस्ते माळ घालून ज्ञानेश्वरीसह संत साहित्याचा अभ्यास सुरू केला.
● आळंदीतील गोपाळपुरा येथे केवल्य आश्रमामधील आनंदस्वामी ऊर्फ दन्तेस्वामी यांच्याकडे बरेच वर्षे राहून वारकरी पद्धतीचे शिक्षण व अभ्यास केला.
● एकनाथी भागवत, विचारसागर, ज्ञानेश्वरी, वृत्तीप्रभाकर, पंचदशी, अशा अनेक ग्रंथावर त्यांचे प्रभुत्व आहे.
● त्यांनी वारकरी शिक्षण देणारी संस्था आळंदीत उभी करून शेकडो कीर्तनकार प्रवचनकार, साधक घडविण्याचे काम केले आहे.
● जाधव यांनी भारतीय तत्त्वज्ञान आणि संस्कृत विषय घेऊन पुणे विद्यापिठातन एम.ए. पदवी मिळविली.
● बीएएमएस शिक्षण घेतलेले डॉ. जाधव व्यवसायाने आयुर्वेद डॉक्टर होते.
● नगर जिल्ह्यातील टाकळी ढोकेश्वर येथे वैद्यकीय निःशुल्क सेवा केली आहे.